د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د پکتیکا په مرکز ښرنه کې د نجونو یوه لېسه هم نشته

د پکتیکا په مرکز ښرنه کې د نجونو یوه لېسه هم نشته

Jun 11, 2017 - 11:59

ښرنه (پژواک، ٢١ غبرګولى ٩٦): د پکتيکا ولايت په مرکز ښرنه کې نجونو ته لا هم له نهم ټولګي څخه د پورته زده کړو زمينه نه ده برابره شوې چې له امله يې زرګونه نجونې له لوړو زده کړو بې برخې شوې دي.

د دغه ولايت د مرکز اوسېدونکې مروه د غبرګولي په ٢١مه پژواک خبري اژانس ته وويل چې د کلونو په تېرېدو سره تر اوسه په ښرنه کې د نجونو لپاره لېسه نه ده جوړه شوې.

د هغې په وينا، که په تېرو ١٦ کلونو کې په ښرنه کې د نجونو لپاره لېسه جوړه شوې واى نو اوس به زرګونه نجونې ترې فارغې شوې وې.

مروه وايي: ((ما تر نهم صنف پورې مکتب ويلى دى، پلار مې هم دې ته راضي شوى چې زه نور درس هم و وايم خو دلته ښرنه کې لېسه نشته، حيرانه يم چې څه وکړم.))

دغه راز د مرکز ښرنې بلې اوسېدونکې شازيې پژواک ته وويل چې په تېرو څو کلونو کې ميليونونه ډالر د پوهنې بهير د پر مختګ لپاره لګول شوي دي.

هغې زياته کړه: ((خو په دې دومره ډالرو کې موږ په ښرنه کې د يوې لېسې خاوندان نه شوو.))

دې د پکتيکا د پوهنې پر رياست تور پورې کړ چې په تېرو کلونو کې يې په دې برخه کې خپل مسووليت په ښه توګه نه دی ترسره کړی.

دوی او د دغه ولايت يو شمېر نورو اوسېدونکو ټينګار کاوه چې حکومت بايد هر څه ژر په مرکز ښرنه کې د نجونو لپاره لېسه جوړه کړي.

د اړوندې موضوع په اړه د پکتيکا د پوهنې رياست د بشري سرچينو امر نور افغان خروټي پژواک ته وويل چې په دغه ولايت د څلورو لېسو په ګډون د نجونو ٢٩ ښوونځي شتون لري.

هغه وايي چې د نجونو دغه لېسې په سروبي، خيرکوټ، اورګون او يوسف خېلو ولسواليو کې دي.

د هغه د معلوماتو له مخې، په دې لېسو کې شاوخوا ٣٣ زره نجونې پر زده کړو بوختې دي.

هغه په دې اړه چې په مرکز ښرنه کې ولې لېسه نشته، وايي: ((دلته ژوند کليوالي دی او خلکو نه دي غوښتي چې لېسه دې ورته جوړه شي.))

خو د دغه ولايت د پوهنې رياست سرپرست محمد نسيم واجد وايي چې د پخوانيو چارواکو د بې غورۍ له امله په مرکز ښرنه کې لېسه نه ده جوړه شوې.

ده وويل چې دغه موضوع يې د پوهنې رياست د راتلونکي کال په پلان کې شامله کړې او په اړه يې وزارت ته وړانديز هم کړى دى.

هغه زياته کړه: ((بل کال ته به موږ په ښرنه کې د نجونو لپاره يوه مجهزه او پر عصري وسايلو سمباله لېسه ولرو.))

خو د پکتيکا يوه اوسېدونکي مجاهد پژواک ته وويل چې په دغه ولايت کې دوه زره نجونې هم ښوونځيو ته نه ځي.

هغه زياته کړه: ((د ٣٣ زره نجونو خبره ډېره لويه ده، د معارف چارواکي غواړي په دې نوم پروژې ترلاسه کړي، دا خبره يواځې يو خيال دى.))

د مجاهد په وينا، د لېسې نه شتون د ښرنې د نجونو په حق کې لويه جفا ده حکومت بايد ورته جدي پاملرنه وکړي.

د پکتيکا د پوهنې رياست د معلوماتو له مخې، په دغه ولايت کې ٣٨٧ ښوونځي شتون لري چې له دغه شمېر څخه نږدې نيمايي یې ودانۍ نه لري.

ورته راپورونه:


Download “Pajhwok” mobile App, on your smartphone to read and access latest news, features, interviews, videos and photos about Afghanistan.

   

نظر ورکړئ

اعلانونه

Advertisement